ചെർപ്പുളശ്ശേരി പോലീസിന്റെ മിന്നൽ രക്ഷാപ്രവർത്തനം; കിണറ്റിൽ വീണ യുവതിക്ക് പുതുജീവൻ

 

ചെർപ്പുളശ്ശേരി: മരണം മുന്നിൽ കണ്ട നിമിഷങ്ങളിൽ, സ്വന്തം ജീവൻ പോലും പണയം വെച്ച് ചെർപ്പുളശ്ശേരി പോലീസ് നടത്തിയ രക്ഷാപ്രവർത്തനം 26 വയസ്സുകാരിക്ക് പുതുജീവൻ നൽകി. കിണറ്റിൽ വീണ അടക്കാപുത്തൂർ സ്വദേശിനി അനുപ്രിയയെയാണ് ചെർപ്പുളശ്ശേരി പോലീസ് സ്റ്റേഷനിലെ ധീരരായ ഉദ്യോഗസ്ഥർ രക്ഷപ്പെടുത്തിയത്. പോലീസിന്റെ സമയോചിതമായ ഇടപെടലിനും സാഹസികമായ രക്ഷാപ്രവർത്തനത്തിനും വ്യാപകമായ അഭിനന്ദനങ്ങൾ പ്രവഹിക്കുകയാണ്.

സംഭവസ്ഥലത്തുണ്ടായിരുന്ന നാട്ടുകാർ നൽകിയ വിവരമനുസരിച്ച്, അനുപ്രിയ കിണറ്റിൽ വീണതായി കാണിച്ച് പോലീസിന് അടിയന്തര സന്ദേശം ലഭിക്കുകയായിരുന്നു. ഒരു നിമിഷം പോലും പാഴാക്കാതെ, ചെർപ്പുളശ്ശേരി SI ഷബീബ് റഹ്‌മാന്റെ നേതൃത്വത്തിലുള്ള പോലീസ് സംഘം സംഭവസ്ഥലത്തേക്ക് പാഞ്ഞെത്തി. ASI ശുഭദ്ര, ASI ശ്യാംകുമാർ, CPO രതീഷ് MR എന്നിവരും സംഘത്തിലുണ്ടായിരുന്നു.

സ്ഥലത്തെത്തിയപ്പോൾ കിണറ്റിനുള്ളിൽ യുവതിക്ക് നേരിയ അനക്കമുണ്ടെന്ന് മനസ്സിലാക്കിയതോടെ, രക്ഷാപ്രവർത്തനം അതിവേഗത്തിലാക്കാൻ പോലീസ് തീരുമാനിച്ചു. സാഹസികമായ ഈ ദൗത്യം ഏറ്റെടുത്ത്, ASI ശ്യാംകുമാറും CPO രതീഷ് MR ഉം ഒരു നിമിഷം പോലും മടിക്കാതെ കിണറ്റിലേക്ക് എടുത്തുചാടി. തണുത്തുറഞ്ഞ വെള്ളത്തിൽ നിന്ന് അനുപ്രിയയെ താങ്ങിനിർത്തുകയും സുരക്ഷിതമായി പിടിക്കുകയും ചെയ്തു.

അതേസമയം, കിണറ്റിന് മുകളിൽ നിന്ന് SI ഷബീബ് റഹ്‌മാനും ASI ശുഭദ്രയും നാട്ടുകാരും ചേർന്ന് കയർ ഉപയോഗിച്ച് അനുപ്രിയയെ മുകളിലേക്ക് വലിച്ചുകയറ്റാനുള്ള ശ്രമങ്ങൾ ഊർജ്ജിതമാക്കി. കൂട്ടായ പരിശ്രമത്തിനൊടുവിൽ അവരെ സുരക്ഷിതമായി കിണറ്റിന് പുറത്തെത്തിക്കാൻ സാധിച്ചു. ജീവൻ തിരിച്ചുകിട്ടിയ അനുപ്രിയയെ ഉടൻതന്നെ അടുത്തുള്ള ആശുപത്രിയിൽ പ്രവേശിപ്പിച്ചു.

ചെറുപ്പളശ്ശേരി പോലീസിന്റെ ഈ ധീരമായ ഇടപെടൽ കേരളാ പോലീസിന്റെ പ്രതിബദ്ധതയുടെയും കാര്യക്ഷമതയുടെയും ഉത്തമ ഉദാഹരണമായി മാറുകയാണ്. സ്വന്തം ജീവൻ പോലും തൃണവൽഗണിച്ച് രക്ഷാപ്രവർത്തനം നടത്തിയ ASI ശ്യാംകുമാർ, CPO രതീഷ് MR എന്നിവരുടെ ധീരത ഏറെ പ്രശംസനീയമാണ്. സമൂഹമാധ്യമങ്ങളിലും പൊതുജനങ്ങളുടെ ഇടയിലും പോലീസിന് വലിയ തോതിലുള്ള അഭിനന്ദന പ്രവാഹമാണ് ലഭിച്ചുകൊണ്ടിരിക്കുന്നത്.